పవనిజం అనే కైపులో జోగుతున్న పవనాభిమనులు 'గబ్బర్ సింగ్' సినిమా విజయం ఇచ్చిన కిక్ నుండి ఇప్పుడుప్పుడే తేరుకుంటున్నారు. ఆ మత్తులో ఉన్న సంతోషాన్ని వారికి అంత తొందరగా దూరం చేయటం ఇష్టంలేని పవన్ కళ్యాణ్ 'కెమరామెన్ గంగతో రాంబాబు ' సినిమాతో మరో డోస్ ఇవ్వటానికి ఈ వారం సిద్దం అయ్యాడు. అభిమానానికి తాలింపు పెట్టి కూర వండితే పవన్ కళ్యాణ్ అభిమానులయ్యరంటా ...! ఎందుకంటే వాళ్ళు ఎంతో గొప్పగా... ఎన్నో రకాలుగా.... ఆయనను అభిమానించటంలో ఉన్న రుచిని ప్రపంచానికి చాటుతూ ఉంటారు. అంతలా వెర్రెత్తి పోయున్నవాళ్ళు ఈ రాంబాబు మీద పెంచుకున్న అంచనాలను ఎంచటం అంటే ఆకాశానికి నుచ్చేనేసినట్టే అవుతుంది.
పవన్ కళ్యాణ్ హీరోగా కెరీర్ మొదలు పెట్టిన తరవాత 1998లో సుస్వాగతం, తొలిప్రేమ చిత్రాలతో ఒకే సంవత్సరం రెండు వెంటవెంట హిట్ లు ఇచ్చి సంచలనం సృష్టించాడు. మరల 12 సంవత్సరాల తరవాత ఇప్పుడు ఆ ఫీట్ ను రీపీట్ చేయటానికి దగ్గరగా ఉన్నాడు. దానికి తోడు ఒకవైపు పవన్ కళ్యాణ్ కున్న క్రేజ్... మరో వైపు పూరి జగన్నాథ్ దర్శకత్వం... వీటికి దసరా సెలవులు కూడా తోడవటంతో... ఇక రాంబాబు ఏ రేంజ్ లో చెలరేగిపోతాడో చూడాలని పరిశ్రమ వర్గాలతో పాటు సామాన్య ప్రేక్షకులు ఆసక్తిగా ఎదురుచూస్తున్నారు.
ఇలా ఎవరి అభిప్రాయాలూ వారికి ఉన్నప్పటికీ కామన్ సినిమా ఆడియన్ కు కావాల్సింది తనను తృప్తి పరిచే వినోదం...! మరి 'జస్ట్ కామన్ మాన్ కాదు.... కామన్ మాన్ హీరో' అని ఈ చిత్రం ద్వార చెప్పించుకుంటున్న పవన్ కళ్యాణ్ కామన్ ఆడియన్ కోరుకునే వినోదాన్నిఈ సినిమాతో ఎంత వరకు అందించగలిగాడో మన సమీక్షలో చూద్దాం.
కధ :
మామూలు మెకానిక్ అయిన రాంబాబు (పవన్ కళ్యాణ్ ) పేపర్లోను , టివిలోను వచ్చే వార్తలను చూసి అన్యాయం అనిపించిన వాటి ఫై తనదైన స్టైల్ లో స్పందిస్తూ ఉంటాడు. ఈ ప్రత్యేకమైన లక్షణమే కెమరామెన్ గంగ (తమన్నా ) సహాయంతో రాంబాబును జర్నలిస్ట్ ను చేస్తుంది. మాములుగా ఉంటేనే తిన్నగా ఉండని తిక్కమనిషి రాంబాబు జర్నలిస్ట్ అయ్యేప్పటికి అప్పటి వరకు ఏకులా ఉన్నవాడు కాస్తా అన్యాయాల పాలిట మేకై కూర్చున్నాడు. దాంతో సహజంగానే రాష్ట్రంలో అన్యాయానికి కేర్ అఫ్ అడ్రెస్ గా ఉన్న ప్రతిపక్షనాయకుడు జవహర్ నాయుడు(కోట ) అతని కొడుకు రానా నాయుడు(ప్రకాష్ రాజ్ )లకు ప్రతిబందకంగా తయారవుతాడు రాంబాబు. ఆ ఫై ముఖ్యమంత్రి కావాలని రానా నాయుడు చేసిన కుట్రలకు అడ్డు కట్టా వేస్తూ అతని పతనాన్ని రాంబాబు ఏ విధంగా శాసించాడు అన్నది మిగిలిన కధ .
విశ్లేషణ :
మన దేశంలో ప్రజాస్వామ్యం కంటే నిరంకుశత్వం ఉంటేనే బాగుంటుంది అని అభిప్రాయపడుతున్న పూరి... దేశం సంగతేమో కాని తను రూపొందించే సినిమాలలో మాత్రం నిరంకుశత్వాన్ని నిరాటంకంగా కొనసాగిస్తున్నాడు. ఎందుకంటే ఒకప్పుడు మంచి కధలతో అబ్బురపరిచే కధనంతో ప్రేక్షకులను కట్టి పడేసిన పూరి ఇప్పుడు కేవలం డైలాగులతో గారడి చేస్తూ పబ్బం గడుపుకుంటున్నాడు. క్రియేటివిటికి ఎప్పుడో చెల్లు చీటి వ్రాసేసి, నేటి బిజినెస్ ట్రెండ్ ను బాగా వంటబట్టించుకున్న పూరి జనాల వీక్ నెస్ కు స్టార్ ఇమేజ్ ను జోడించి అందినకాడికి దండుకుంటున్నాడు. ఆ ప్రయత్నంలోని మరో అంకమే ఈ 'కెమరామెన్ గంగతో రాంబాబు'. కధ లేకుండా సినిమాలు తీయటం అలవాటు చేసుకున్న పూరి ఈ సినిమాను కూడా ఓ నాలుగు మంచి సన్నివేశాలు , కొన్ని పదునైన డైలాగులను ఆసరాగా చేసుకుని మమ అనిపించాడు .
ఇక కధ విషయానికి వస్తే పవన్ కళ్యాణ్ జర్నలిస్ట్ గా నటించాడు అన్న ప్రత్యేకత తప్పించి రెగ్యులర్ గా నడిచే రొటీన్ పాయింటే....! కధనం కూడా మన ఊహల పరిదిలో మనం ఊహించే విధంగానే ఉంటుంది. తానూ చెప్పాలనుకున్న పాయింట్ ను సూటిగా చెప్పుకుంటూ పోవటమే తప్పించి లాజిక్కులు గిజిక్కులు గురించి ఆలోచించటం మానేసిన పూరి... అందుకు అనుగుణంగానే ఈ సినిమాలో లజిక్కులకు అతీతంగా హీరో పాత్రను సృష్టించాడు. అన్యాయాలకు స్పందించటం అంటూ.... రాంబాబును ఎవరిని పడితే వాణ్ణి ఎక్కడ పడితే అక్కడ వీర కుమ్ముడు కుమ్మేస్తూ ఉంటాడు దానిని టివి లో కూడా చూపిస్తూ ఉంటారు కాని ఎవరు ఏమి చేయారు. అలానే అన్యాయాలను ఎదుర్కునే రాంబాబు మొండిగా ప్రవర్తిస్తూ ఉంటాడు తప్పించి వాటిని రూపుమాపటానికి ఏ విధమైన చొరవ తీసుకోడు. అదెలా .. కామన్ సెన్సు అనిపించుకుంటుందో అర్ధం కాదు.
అలా మొదటి సగం మొత్తం అనవసరమైన ప్రశ్నలను , కొద్దిగా అసహనాన్ని కలిగిస్తూ గడిచిపోతుంది. తీరు తెన్నూ లేకుండా పోతున్న రాంబాబుకు రానా నాయుడు ఇంటర్వెల్ కి ఓ చాలెంజ్ ఇస్తాడు. అది రాంబాబుకు, చూస్తున్న జనానికి కూడా ఊరట కలిగిస్తుంది. ఆ తరవాత కూడా పెద్దగా చెప్పుకోవాల్సింది ఏమి లేదు కాని పూరి అనుభవం ఫామ్ లోకి వచ్చి ఓ రెండు ఎపిసోడ్లు మాత్రం బాగా కుదిరాయి. అవే సినిమాకు హై లైట్. పూరి సినిమా క్లైమాక్స్ మాత్రం చాలా బాగా ప్లాన్ చేసి అంతే బాగా ప్రెజెంట్ చేశాడు . కాకపోతే ఒక కండిషన్ క్లైమాక్స్ ను విడిగా చూడాలే కాని సినిమాలో భాగంగా ఎంజాయ్ చెయ్యలేం. ఎందుకంటే అప్పటి వరకు మాములుగా ఉన్న రాంబాబు ఒక్కసారిగా జనాలను ఉద్దరించటానికి పూనుకుని 5 నిమిషాలలో వారిని మేలుకొలిపి ఒక్క పూటలో ఉద్యమాన్ని వేడెక్కించి , ఒక్కరోజులో రాష్ట్రానికి పట్టిన చీడను వదిలిస్తాడు. ఇది ఎంతవరకు సాధ్యమో ఎవరికీ వాళ్ళే ఆలోచించుకోవాలి.
కాకపోతే ఈ సినిమాకు అతి పెద్ద ఆకర్షణ పవన్ కళ్యాణ్. ఆయనే లేకపోతే ఈ సినిమా ఈ మధ్యే విడుదలైన మరో 'దేవుడు చేసిన మనుషులు' అయ్యుండేది ... నిస్సందేహంగా...! అసలు సరిగ్గా సినిమా తియ్యాలి అనుకుంటే 'ఒకే ఒక్కడు ' రేంజ్ ఈ రాంబాబుది. కాని ఇక్కడ మేటర్ అది కాదు తీసామా ...! తోసామా .......! అయిపోయిందా...! కనీసం ఆరు నెలలన్న తియ్యల్సిన సినిమాను మూడు నెలలకే చుట్టేస్తుంటే ఇంతకంటే నాణ్యతను ఏ విభాగంలోనూ ఊహించలేం. మాటల రచయతగా పూరి చాలా చోట్ల బాగానే క్లాప్స్ కొట్టించుకున్నాడు. మణిశర్మ పాటలు, బ్యాక్ స్కోర్ చాల వరకు ఈ సినిమాను బ్రతికించాయి. 'జరమొచ్చింది ....' , 'మెలికలు తిరిగే అమ్మాయో... ' పాటలు కన్నుల పండుగా చేశాయి . శ్యాం కె నాయుడు కెమెరా తో సహా అన్ని విభాగాలు వారికున్న అవకాశం మేర బాగా పనిచేశాయి.
పవన్ కళ్యాణ్ ఒన్ మాన్ షో ఈ రాంబాబు. కొత్తగా కనిపించాడు ...డైలాగులను చిత్తు చిత్తూ చేశాడు . పవన్ డైలాగులు చెబుతుంటే విజిల్ వేయటమో... క్లాప్స్ కొట్టడమో చేయకుండా ఉండలేం ఇది నిజం. పవన్ లో గ్లామర్ కూడా కొద్దిగా పెరిగినట్టుంది చాలా అందంగా కనిపించాడు . తమన్నా ఆకట్టుకుంది. అందానికి అభినయాన్ని సమపాళ్ళలో జోడించి అవకాశం మేర బాగా నటించింది. పాటల్లో కూడా తన ప్రెజెన్స్ ను చాల చక్కగా తెలియచేసింది. కోట, ప్రకాష్ రాజ్, తనికెళ్ళ భరణి వారి సహజ ధోరణిలో నటించారు. బ్రాహ్మి , ఆలీ చేసిన కామెడీ పర్వాలేదనిపిస్తుంది. బ్రాహ్మి తో న్యూస్ కంటెంట్ మరియు రీడింగ్ మీద పూరి వేసిన సెటైర్ బాగుంది. మిగత నటులు వారి పాత్రలకనుగుణంగా బాగానే నటించారు.
ప్లస్ పాయింట్స్ :
పవన్ కళ్యాణ్ నటన, మణిశర్మ సంగీతం, కొన్ని పూరి డైలాగులు ఈ సినిమాకు ప్లస్ పాయింట్స్
మైనస్ పాయింట్స్ :
రొటీన్ కధ , ఆకట్టుకోలేని కధనం, కామెడీ మోతాదు తగ్గటం ప్రదానంగా మైనస్ పాయింట్స్.
కొసమెరుపు:
దసరా సెలవుల పుణ్యం , పవన్ కళ్యాణ్ కున్న క్రేజ్ ఈ సినిమాను గట్టేక్కించవచ్చు కాని రెండు వారాలకు మించి నిలబడటం కష్టం అనే టాక్ బలంగా వినపడుతుంది ఇండస్ట్రిలో...! కాని సంచలనాలు సమయానుకూలంగా నమోదవుతాయి అనేది సినిమాలకు సరిగ్గా సరిపోతుంది. అ లెక్కన రాంబాబు భవితవ్యం ఫై స్పష్టత రావటానికి ఓ వారం ఆగాల్సిందే..!
Maruthi Talkies Rating 2.75 out of 5
No comments:
Post a Comment